"წესები რომ შევცვალოთ, კიდევ ერთ პსჟ-ს მივიღებთ", - ლა ლიგის პრეზიდენტმა პარიზელები გააკრიტიკა

ლა ლიგის პრეზიდენტმა, ხავიერ ტებასმა კიდევ ერთხელ თქვა, რომ "ბარსელონადან" ლიონელ მესის წასვლა მისი ბრალი არ არის.

"ცხადია, მესის წასვლა ჩემი ბრალი არ იყო. ფეხბურთს სტაბილურობა სჭირდება. სერია ა 20 წელია ფულს კარგავს, იგივე ხდება საფრანგეთშიც. მაგრამ ასე არ არის გერმანიასა და ესპანეთში".

"წესები საჭიროა, რადგან მათ გარეშე ისეთ გუნდს მივიღებთ, როგორიც "პსჟ"-ა, რომელიც 400 მილიონს გამოიმუშავებს და 600 მილიონს მხოლოდ ხელფასებში ხარჯავს".

"ჩვენ არ ვართ დამნაშავეები იმაში, რომ მესის კონტრაქტი ვერ გაახანგრძლივა, სახელფასო ზღვარი გვაქვს და ეს ლა ლიგას მდგრადს ხდის", - ციტირებს ტებასის სიტყვებს AS.

შეგახსენებთ, 34 წლის არგენტინელი სუპერვარსკვლავი ამ სეზონის დაწყების წინ თავისუფალი აგენტის სტატუსით "პსჟ"-ში გადავიდა.